الشعر في شرعي فكر والفكر بــالشعر الاصيل
نـــــهج العـــــقول الناضجــه والعاقلين ادرى بها
مو شرط من يكتب شعر يدري عن بحور الخليل
اللي يـــــــــــداوي علـــتك لا تبــلـشه باسـبابهااا
احدن على الحنده حدا واحدن على الشله يشيل
كلن على مايكرب بيوته يمس اطنابها
على سبيل اهل المثل ماني مثل اهـل السبيـل
اللي معاني حضورها تشبـه معانـي غيابهـا
لا غبت جبت وعادتي لاغبت ماارجع بالهزيل
ان جبت اجيب اللي محد بالشعر قبلي جابهـا
تعشقني الفكره ..بكر..واسبق لها الوزن الثقيل
اللي بنات افكارهـم مبطـي رميـت حجابهـا
اهيم في وادي الدهى واروي حديث السلسبيل
يومن غيري جامعن كتب الشعر يقرى بها
مابالقرايه راية بيضا ولامنها ذبيل
لاروحت خيل الطرد تبكي على هذّابها
بعض المعاني وقعها اشطر من السيف الصقيل
يوم السيوف من الهلع تثقل على قضّابها
ناس على الشعر ادخلت والشعر بي منهم دخيل
يقول انا بوجهك عن الهزلى وعن كتّابها
ومدام صارت تشكي العله من اسباب العليل
قل للجماعه ترمي ثياب مهي بثيابها
ماهي بلحيت طشطشه سيل من العارض يسيل
اسقى جبال المملكه وسهولها وهضابها
فان قيل ابوظبي ابرقت وعيون اهاليها تخيل
قولو لها عيني لها مبطي ترف اهدابها
مساكم الله بالادب والذوق والشعر الجزيل
من شاعر صدره يسع مكه ومن يسعى بهاا
شاعر شمالي وقفته عن لابته تشفي الغليل
يدرى زعلها ويحمى عنها ويخشى عتابها
في ميلت عقاله ثقه وبفطرته صبرن جميل
يحسب مسافت صيدته واليا رماها صابها
انا البديل انا البديل انا البديل لعمرو بن كلثوم لو ماله بديل
لا قامت فحول الشعر تفخر بطيب انسابها
لا المستحيل يردني ولا ابـن عـم المستحيـل
ياماكسرت القاعده واخلفـت وجـه اعرابهـا
صدري ليا عليت علا واليا استطالت يستطيل
اما استوت لي كلها والا بلاش اشقى بها
عندي قناعه ظلها وافر ولي فيها مقيل
ما امشي ورا قالو قبل و اعيش في جلبابها
ما من ورى زرع المثل في وقتنا الحاضر حصيل
من طبق امثال العرب في هالزمن يبلى بها
من ذل قالو سلم يبقى بنظرتهم ذليل
ماتستوي القمه تحت رجلين منهو هابها
ايه الشجاعه تغلب الكثره وانا اعطيك الدليـل
الذيـب يـدرع بالغنـم ولا يحسـب حسابهـا
جيت بشموخ الوايلي ماجيت من تحت الشليل
ولاردني عن ساحت الشعار كبر القابهااا
لو كل من اسمه جميل من العرب يطلع جميل
كان أكثر اسماء العرب تحمل صفات اصحابها
ولا ينعم بظل النخيل اللي تحت جـذع النحيـل
الشمس تصقع هامتـه حتـى يحيـن غيابهـا
ولا طولت عمر أدمي قولة عسى عمرك طويل
طول العمار وقصرهـا رب العبـاد ادرابهـا
رح ردها عني وانـا بأكبـر عواقبهـا كفيـل
كان طلعت كذبـه فأنـا بيـن العـرب كذابهـا
ان الشجاعه تغلب الكثره وهـذا اكبـر دليـل
الذيـب يـدرع بالغنـم ولا يحسـب حسابهـا
صح لسانك و بيض الله وجهك .
ReplyDelete