اللي لا دعته الناس لبّى واجـاب

اللي لا دعته الناس لبّى واجـاب

ربٍ عطوفٍ يشوف ظروفها ويروف باحوالهـا

ومن بعد ذا مرحباً واهلاً هلا ماهل وبل السحاب

وعداد ماناح ورق ولاح ضوح البرق بخيالهــا

اهلاً هلا بالضيوف اهل الوفا والطيب شيب وشباب

اهلاً هلا بالجميع ومرحباً مليون برجالهـا

روس الحمايل زحازيح الرجال مصخرين الصعاب

نشهد وتشهد لهم ماض السنين وحاضر اجيالها

والمدح لاجا مجاله وانفتح للمدح باب وجواب

أشد الامة تميم اليـا ظهر للناس دجالها

ومن فضل رب الخلايق والملا جزل العطا والثواب

ربعي اليا عدت افعال الرجال تنومس افعالهـا

ولا شك بان الحسب مـاينفع المخلوق يوم الحساب

وان النسب مايفكه من عذاب النار واهوالهـا



واصله وفصله وماله باكر اليا حط حدر التراب

والله ماتنفعه والناس يوم العرض باعمالها

تمسكوا بالفلق والناس والأخلاص وام الكتاب

تلقونها يوم الحشر لازلزلت ذا الارض زلزالها

والهرج لازاد زروده نقص والحكمه بفصل الخطاب

والحر حرٍ يرى مخراجها من قبل مدخالهـا

والحمد للواحد اللي لادعته الناس لبّى واجاب

ربٍ عطوفٍ يشوف ظروفهـا ويروف باحوالها

والختم صلوا على خير الملا مابان نجمٍ وغاب

وما حمس بن اليمن والشاذليه دار فنجالها