ظروفنا ماتستحي وايامنا ماهيب ريف ,,

القصيدة لـ محمد بن الذيب ..... ويقول فيها



ظروفنا ماتستحي وايامنا ماهيب ريف = والأرض من كثر القحط ماعاد شفت اعلافها
وحقي على البيت القوي ماهو على البيت الضعيف = وإلى بغيت أدمدم الجمه على غرافها
خليت شمس العشق مركونه على حد الرصيف = الخطه المحبوكه تحقق جميع اهدافها
يا اهل الثنائيات مضمون الثنائه سخيف= أنا لحالي أحكم الدفه مع مجدافها
والمعرفي (شرطي) وخاواني ورقيته (عريف) = لكن تجهله العلوم ارباعها وانصافها
يبغى يسوي مع جنابي بهرجه وانا مخيف = وهو الى شاف الدروب المستحيله خافها
والمختلف مجلة الجمهور والشعر النظيف = ماهي غريبة لالقيتو صورتي في غلافها
بس الغريبة يوم مريت الحساء ياهل القطيف = تذكرت عيني مدامعها على مشرافها
واليوم مابه عذر يوم ارقاك يالضلع المنيف = الا اني اتعب ارجولي من كثر وقافها
واكثر مشاريه الشجر عليك يافصل الخريف = هتكت ستر غصونها واسرفت في كلافها
انا جويع وجوعي مواصل ماهو قطعة رغيف = وعيني من الفرقا حداها الهم عن محرافها
والعفو عند المقدره صوره من الحب العفيف = هذا كلام اللي قطار العمر كله طافها
اخذت فـ أبها شهر كامل يسمونه مصيف = والشمس تحجبها السحابه والرعود خلافها
وعينت صاحبة الشداد اللي تمناها الرديف = (ضيدان) قبلي شافها و(الهاجري) قد شافها
لكنها استثنتني وروتني اللي مايشيف = واخذت ثار اسلافي الغابر بظلم اسلافها
الفرصه اللي كنها البراق في عرض القنيف = لقمة غني مدها على فقير وعافها
ونا طموحي للثقيل من الجواهر يالخفيف = ماني بأدور عملة ماينعرف صرافها
يانحرها وش قصة الارداف والخصر النحيف = قدام اموت فـ حظنها ولا انتحر فـ اكتافها
لايبرد الفنجال وابلشها مثل بلشة حنيف = واخذ بدل خمس عشر فنجال بعض اطرافها
لو انها حمامة الولهان ياودي ثقيف = ماطاحت دموعي على خدي بعد رفرافها
لكن ياقصر الضيافه ماتقصر في المضيف = دامك تضم من النفوس اثقالها واخفافها
لا ياعنيفه هدي اللعبه ترا الهجر العنيف = ماهوب جزء من تقاليد العرب واعرافها
يابنت حواء عذري اللهفه لو امتد النزيف = استلطف جروحك ويستهويني استلطافها
وانا من الجنس الخشن وانتي من الجنس اللطيف = ومشاعري باحاداها واعشارها والافها
تصرخ غلا محتاجلك محتاجلك يااغلى وليف = والنفس فطرتها ترجعها على ميلافها
واشتاق لك شوق المسافر من بلاده للنكيف = لو اتحداها من السنين الممحلات أعجافها
الموت من فرقاك مثل الموت بالسيف الرهيف = والعمر واحد والنهايه واحده باصنافها
ماعاد عندي شي أقوله بس بأنوه وأضيف = إلى لقيتي صورتي في المختلف واغلافها
تغطرسي مثل القمر عالي وقولي للرصيف = الشمس تحجبها السحابه والرعود خلافها